ฟังลำเพลินชมป่า โดย หมอลำบัวศรี เหมแดง และหมอลำสวาสดิ์ ประทุมทอง

กลอนลำเพลินชมป่า

ถ้าสินับหมู่ไม้ในป่าก็มีถมสิพาหนูไปชมเที่ยวดงเดินด้าว ไปนอสาวนางหล่าโสภาไปเดินป่าชมรุกขชาติไม้ไฟส่านป่าสานบ่คือเฮาอยู่บ้านยามผ่านไพรฮกมองเห็นกกแกมกอป่ายอแคมแต้ แคปนติ้งทิงดงเลียบป่งดงแห่งหนามืดมุ้งมุงไว้ชั่วไกล บ่จักคาแกมอ้อกอแขมถ่ายไม้น้อยใหญ่เป็นถันกกกะดันเป็นแถวต่อแนวฮังฮ้อน ชอนลอนต้นปนกันปีนป่าย ฮอดป่ากล้วยมันก็มีแต่กล้วยบ่มีไม้อื่นปน ต้นต่อต้นกล้วยทะนีนัยเฟื่องไฟหวานม่วงมะดันมี มีหลายต้นผลผลาในป่ากงสะเด็นหวดข่าเป็นปุ้มป่องไปไม้เกิดช้อนเป็นบอนทิงทัดบ่อนคนตัวคนฟันป่าคาเป็นค้า บ่จักคาแกมอ้อกอแขมแกมแฝกไม้ตะแขกเหมือดต้นกระโดนดั้วดู่แดง กายป่าแป้งกกหมากแหน่งเป็นแถว กกหมากแงวเป็นถันหมู่มันแฮมเฮื้อ เครือพันเกี้ยวคางคงายหม่วยจ้องพี่ค่อยหยองดุ่งดั้นเขื่องข่องแข่งปา เครือสะบ้าปนป่าหนามหัน พี่ลำความพันความหลังนั่งเชาเงาไม้เพ็งไทยร้องมองดงใจหล่งจิตพะวงห่วงชู้ดูไม้ชื่นใจ แสนอาลัยยามไกลคู่ครอง คิดถึงแม่รูปทองหมองเศร้าทรวงใน ไกลนางน้องมองดงบ่เห็นทุ่ง ดงแห่งหนามืดมุ่งเรียนต้นก่ายกอ จิกสะเดื่อค้อต้นต่อเรียนกอ ยอยมคุณเหมือดคนเรียน สับสนเกี้ยวกกเดียวหลายง่ากกเป็นตาตุ่มเต้างงแง้นแอ่นกลาง ป่าอ่อยช้างปนป่าชางหนา ต้นตานาตากวางป่าพวงใบกว้าง ใบหูกวางหูเหม่นกกเข็นเอ็นอ่อนเครือเขาคอนจ่องเกี้ยวพันหยุ่งป่ากอยไม้ใกญ่น้อยฮ้อยบ่อนเป็นดอน มันมีขอนมีตอป่าปอมันฮ้าง คนถางไว้ไฟลนจูดจี่เดิดเป็นฮกเฮื้อเครือเกี้ยวผ่านกัน เดินไฟสันเถาวัลย์ม่านมุ่งแสนรุ่งรัง อัศจรรย์เถาวัลย์ตะวันร้อน ๆ สัญจรตามภัย ในดงนั้นเถาวัลย์เกี้ยวพุ้มมองเห็นเขียวชะอุ้มลำดังชั่วยามตกช้างน้าวแครอ่าวฮังผาต้นมันบาเป็นถันป่ากระดันเป็นจุ้มชุมไผไว้บ่ปนกันถันถี่ ส้มปี๋แต่ไม้ในด้าวด่านไฟไปเห็นแล้วหลายแนวโอ้อ่าวคิดเห็นสาวอยู่เลยโงโค้งต่าวคืน

หมอลำกลอน (ฝ่ายชาย): นายบัวศรี เหมแดง อำเภอเขมราฐ จังหวัดอุบลราชธานี

หมอลำกลอน (ฝ่ายหญิง): นางสวาสดิ์ ประทุมทอง อำเภอเขมราฐ จังหวัดอุบลราชธานี