ฟังลำล่องยาวออนซอนอีสาน โดย หมอลำบัวศรี เหมแดง และหมอลำสวาสดิ์ ประทุมทอง

กลอนล่องยาวออนชอนอีสาน

เมืองเอ้ยเมืองอีสานเฮานี้บ่มีวันสูญสิ้น ถ้าเสียงพิณเสียงแคนยังม่วนอยู่คือเก่า ธาตุพนมหัวอกของพระพุทธเจ้าตั้งอยู่ ๆ กำพร้าคนไหว้อยู่บ่เซา มันสิเศร้าบ่อนจังได๋เด้นอ…น่อเดียวนี้เมืองไทยก้าวชาวอีสาน เจริญคืบคืบขึ้นสูงชั่วฟ้าเป็นหน้าไข่สออนบ่ได้มีเดือดร้อนฮ้อนเฮ่งแนวได เศษฐกิจพอเพียงเพิ่นแนะนำเฮาไว้ เฮ็ดลงไปเทิงนาฝนนาแล้งปลูกหมากอื้อหมากแตงสิคอนแบ้งจนหลังก่ง ขายเอาเงินใส่ถงผักกาดหัวผักบัวพร้อมหอบป้อมผ่องกระเทียมเตรียมดินไว้แบบนาไฮ่สวนผสม เลี้ยงโคนมไปนำส่ำว่าเงินบ่จนน่า ขุดสระไว้เอาปลานาปล่อย ปลูกกล้วยอ้อยไว้เลาะข้างสองทางตะฝั่งสาขายแต่ปลากะพอแล้วขั่นปายเปิดสู่แนวบ่ต้องเว้าดอกเงินหมื่นความสนุกราบรื่นบ่สิฮ้อนฮ่อมใด ภาคอีสานเหนือใต้ยุคใหม่พวมเจริญ ถนนเดินไปมาสะดวกดีเหลือล้น มีรถยนต์ มอเตอร์ไซค์นั้นแล่นหากันจนขึ้นป่วย จักค้างัวขายควายมีอยู่ทุกหมู่บ้านสวรรค์ฟ้ากะบ่ปานยามเป็นงานจ้างหมอลำหมอฟ้อนหลุดเป็นตาออนซอนพากันเต้นม่วนชื่นจนว่าตาลูกอ่อนนมแปรหลดมาเหลียวมาแลเบิ่งยามเขาเต้น ภาคอีสานมันหากเป็นแนวนี้ประเพณีพื้นเก่า ทั้งผู้หนุ่มผู้เฒ่าครองเค้าเผิ่นถือ เจริญขึ้นสู่มื่อทางวัดวาอารามเจริญขึ้นสู่บ้อนตั้งแต่ก็แต่ก่อนพวกพระสงฆ์เจ้าเรียนรู้บ่สูง เดียวนี้พรุ้งขึ้นไปฮอดดาวจบวิทยาลัยนิวเดนลีแห่งอินเดียพุ้น มีทุกเรียนจบฮอดชั้นดอกเตอร์พุ้นเด้อพระเผิ่นเรียนสูง มาปรับปรุงอารามวัดจนสู่วันเจริญมีแต่แสงไฟฟ้าหรูหราเจริญฮุ่ง วัดบ้านนอกในกรุงแม่นวัดภูวัดถ้ำเจริญล้ำส่ำกัน พวกญาติโยมมีระดับทุกชั้นมาเข้าวัดจำศีลสนุกกินสนุกทานภาคอีสานเฮานี้บ่ส่างมีความฮ้อนอนาทรพวกน้อง มีจิตใจอ่อนน้อมบ่เคยแล้งแห่งน้ำใจ ภาคอีสานเฮาได้ถือศาสนาพุทธบริสุทธิ์ศีลธรรมผ่องจังหันเพลค่ำ ฟังคำสอนของพระโคดมเจ้าองค์สัมมาเผิ่นบอกเล่าทั้งหลวงตายาปู่เฒ่าสวดมนต์เย็นค่ำเช้าบ่มีได้เปลี่ยนแปลง ข่อนสิแจ้งยาครูหน่ำกองเดิ้กเตือนสติคนนอนว่าฮอดวันศีลแล้วเตรียมสู่แนวแม่ออกเฒ่าพาลูกหลานของเฮายามมื่อเช้าตักบาตร ทั้งผ่องหยาดน้ำให้ชุมตายแล้วมาคอยถ้ารับบุญ ยามเป็นงานบีบข้าวปุ้นต้อนรับหมู่ผู้ทางไกล สิหาใสมาคือภาคอีสานเฮานี้ เชิญมาชมเบิ่งตี้ ขั่นบ่คือความเว้ามาเอาบุญเดือนสี่จักผู้ฮ้ายผู้ดีผู้หนุ่มผู้เฒ่ามาโฮมเต้าแห่กันหลอน ออนชอนเด้ ….น่อ สักคติขันข่อนเสียงยาครูเทศน์ว่อน ๆ มาฮอดกัณฑ์นครแห่พระเวสเข้าบ้านอีสานเอ้ยม่วนหลายเชิญมาเด้อมาเด้อ พวกน้องอ้ายผู้ไปเที่ยวทางไกล อย่าสิไลลืมหลงอีสานเฮานี้มันมีหลายเหลือล้นบ่อึดจนบ่อนท่องเที่ยว เดียวนี้ภาคอีสานเขียวฟ้าฝนบ่แห้งแล้ง เดียวนี้สุ่มเลิงเปิงอีสานเฮานี้ใจชื่อถือธรรมมีหมอลำหมอแคนแอ่นระบำรำฟ้อนมีลำกลอนลำซิ่ง ลำเพลินเต้นออกเสิ่นหมอลำหมู่ลำเดินมีบทบาทวาดฟ้อนฟังแล้วชื่นอุรา สุขอยู่ใต้หลุ่มฟังมีแต่แดดกับฝนสุขอยู่ในเมืองคนเฮานี้มีข้าวกินมีเมียพร้อมแสนดีหลดม่วนชื่น ส่วนภาคอื่นผมบ่เว้าเขานั้นต่างเฮา เดียวนี้ฮ้อนอูดเอ้าฆ่าจี่กันกิน บ่ถือศีลถือธรรมถ้าเบิ่งกรรมสินำต้อง มีแต่ความหมองไหม้จิตใจหลดขุ่น ภาคอีสานของเฮาสนุกแต่ทำบุญบ่ได้มีเดือดฮ้อนนอนขาเกี้ยวก่ายกันสวรรค์เมืองคน …… เอ่ย  น่อ

หมอลำกลอน (ฝ่ายชาย): นายบัวศรี เหมแดง อำเภอเขมราฐ จังหวัดอุบลราชธานี

หมอลำกลอน (ฝ่ายหญิง): นางสวาสดิ์ ประทุมทอง อำเภอเขมราฐ จังหวัดอุบลราชธานี